બટાકાને બાફી, છોલી, માવો બનાવવો. બ્રેડની બાજુની કિનાર કાઢી, બાકી કટકા કરવા. બટાકાને માવો, મીઠું અને બ્રેડ નાંખી, ખૂબ મસળી સુંવાળો માવો બનાવવો. તેમાંથી ગોળો લઈ હાથમાં પૂરી થાપવી. જરુર પડે તો થોડો ચોખાનો અથવા મેંદાનો લોટ હાથે લગાડવો. પછી તેમાં તૈયાર કરેલી ચટણી લગાડી મોં બંધ કરી ચપટી પેટીસ વાળવી. નોનસ્ટિક તવા ઉપર અથવા સાદા તવા ઉપર તેલ મૂકી તળી લેવી.
ટામેટાને પાણીમાં બાફી, સૂપના સંચાથી ગાળી સૂપ તૈયાર કરવો. ધાણા, જીરું, વરિયાળી, તજ, લવિંગ બધું કોરું શેકવું. તેમાં કાજુ, નાળિયેનું ખમણ, ખસખસ, કાશ્મીરી મરચાં અને લીલા ધાણા નાંખી મસાલો વાટવો.
એક વાસણમાં તેલ મૂકી તેમાં ડુંગળીનું કચુંબર નાંખવું. બ્રાઉન કલર થાય એટલે તેમાં વાટેલો મસાલો નાંખવો. સુંગધ આવે એટલે ટોમેટો સૂપ, ટોમેટો કેચઅપ, મીઠું, થોડીક હળદર, ખાંડ અને પ્રમાણસર પાણી નાંખવું. જાડું રસાદાર થાય એટલે ઉતારી લેવું.
એક બાઉલમાં બે પેટીસ મૂકી તેના ઉપર ગરમ ગ્રેવી નાંખી, ચણાની સેવ ભભરાવવી.
