వెజిటబుల్ పులావ్
  • 312 Views

వెజిటబుల్ పులావ్

కావలసినవి:

  • బియ్యం : అర కిలో
  • కారెట్ : నాలుగు అయిదు ( చిన్న చిన్న ముక్కలుగా తరుగుకోవాలి )
  • బీన్సు: వంద గ్రాములు ( చిన్న చిన్న ముక్కలుగా తరుగుకోవాలి )
  • బంగాళా దుంపలు : నాలుగు  ( చిన్న చిన్న ముక్కలుగా తరుగుకోవాలి )
  • ఉల్లిపాయలు : అయిదు ఆరు ( పొడుగ్గా చీలికలు చేసుకోవాలి)
  • కాలిఫ్లవర్: ఒక చిన్న పువ్వు ( కావాలంటే వేసుకోవచ్చు )
  • పచ్చి బఠాణీ : ఒక కప్ ( నాన బెట్టినవి, లేదా తాజావి )
  • లవంగాలు: అయిదు ఆరు
  • యాలకులు : అయిదు ఆరు
  • దాల్చిన చెక్క : అయిదు ఆరు చిన్న ముక్కలు
  • అల్లం వెల్లుల్లి ముద్ద : రెండు టీ స్పూన్లు
  • నూనె , నేయ్యి లేదా డాల్డా : తగినంత
  • పచ్చిమిర్చి: అయిదు ఆరు( చీలికలు చేసుకోవాలి)
  • ధనియాలు, జీలకర్ర పొడి: రెండు స్పూన్లు ( కావలిస్తే వేసుకోవచ్చు )
  • కారం: ఒక స్పూను ( కారం ఇష్ట పడేవాళ్ళు వేసుకోవచ్చు )
  • పసుపు: చిటికెడు ( రంగు కోసం )
  • ఉప్పు : రుచికి తగినంత
  • నీరు: ఒక కప్పు బియ్యానికి రెండు కప్పుల నీరు
  • కొత్తిమీర: ఒక కట్ట
  • పుదినా : అర కట్ట ( తినేవారు వేసుకోవచ్చు)
  • జీడిపప్పు: పది పదిహేను ( కావాలంటే వేసుకోవచ్చు)
  • బిర్యాని ఆకు : రెండు మూడు

విధానం:

ముందుగా బియ్యం కడిగి నీటిలో ఒక అరగంట నాన నివ్వాలి. కూరలన్నీ తరిగి పెట్టుకోవాలి.ఒక మందంగా ఉన్న గిన్నె గాని కుక్కర్ గాని తీసుకొని గ్యాసు మీద పెట్టాలి. అందులో సుమారు రెండు మూడు టేబుల్ స్పూన్ల నూనె వేసుకోవాలి. నూనె కాగాక అందులో లవంగాలు, యాలకులు , జీడి పప్పు, బిర్యాని ఆకు మరియు చెక్క వేసి వేయించాలి.ఇప్పుడు అందులో ఉల్లిపాయలు వేసి దోరగా వేయించాలి.ఉల్లిపాయలు వేగాక అల్లం వెల్లుల్లి ముద్ద వెయ్యాలి. అది పచ్చి వాసన పోయే దాక వేయించి పచ్చి మిర్చి వేసుకోవాలి. వేగాక అందులో తరిగి ఉంచుకున్న కూరగాయ ముక్కలు వేసుకోవాలి.అవి కొంచెం వేగ నివ్వాలి. ఇప్పుడు నానబెట్టుకున్న బియ్యం వెయ్యాలి. అన్ని బాగా కలిపి కొత్తిమీర, పుదినా, ఉప్పు, పసుపు, కారం మరియు ధనియాలు జీలకర్ర పొడి వేసి బాగా కలుపుకోవాలి. ఇప్పుడు ఒక వంతు బియ్యానికి రెండు వంతులు నీరు పోసి అన్నీ బాగా కలిపి మూత పెట్టుకోవాలి.కుక్కర్ ఐతే మూడు కూతలు రాగానే కట్టేయ్యాలి. గిన్నెలో ఐతే అన్నం ఉడికాక గ్యాసు కట్టేయ్యాలి. పులావ్ తో పాటు ఉల్లిపాయ రైతా చేసుకుంటే బాగుంటుంది.